Açıq bankçılıq və süni intellekt maliyyə sektoru üçün ciddi təhdidlər yaradır - Qasımlı

Açıq bankçılıq, süni intellekt, blokçeyn və tokenizasiya kimi yeni texnologiyalar maliyyə sektoru üçün ciddi çağırışlar yaradır və onların tənzimlənməsi əsas məsələlərdən birinə çevrilib. Bunu İqtisadi Statistikanın Tədqiqat və Kommunikasiya Mərkəzinin icraçı direktoru Vüsal Qasımlı Türk Dövlətləri Təşkilatının maliyyə-bank sektoru üzrə keçirilən tədbirdə bildirib.

Onun sözlərinə görə, maliyyə sektorunun qarşısında duran əsas problemlərdən biri tənzimləyici mexanizmlərin yeni texnologiyaların inkişaf tempinə uyğunlaşdırılmasıdır.

" Süni intellekt, blokçeyn, paylanmış reyestr sistemləri, tokenizasiya və açıq bankçılıq maliyyə sektoru üçün ciddi təhdidlər yaradır”, - Qasımlı bildirib.

O qeyd edib ki, bu problemlər artıq yalnız regional deyil, qlobal xarakter daşıyır və ABŞ ilə Avropanın aparıcı maliyyə institutları da bu məsələləri aktiv şəkildə müzakirə edir.

Qasımlının fikrincə, əsas vəzifə yeni texnologiyaların inkişafını dayandırmaq deyil, onların düzgün istiqamətləndirilməsini və sağlam tənzimlənməsini təmin etməkdir.

O əlavə edib ki, Türk Dövlətləri Təşkilatı çərçivəsində maliyyə inteqrasiyasının gücləndirilməsi üçün rəqəmsal maliyyə sahəsində ortaq yanaşmaların və tənzimləmə mexanizmlərinin formalaşdırılması vacibdir.

N.Təbrizli