Azərbaycan İKT ixracını 1 milyard dollara çatdırmağı hədəfləyir

Azərbaycan informasiya-kommunikasiya texnologiyaları (İKT) sektorunda illik ixrac həcmini hazırkı 25 milyon dollardan 1 milyard dollara çatdırmağı planlaşdırır. Bunu İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanlı bildirib.

Onun sözlərinə görə, bu hədəf 2026-2030-cu illəri əhatə edən Rəqəmsal İnkişafın Sürətləndirilməsi üzrə Fəaliyyət Planında öz əksini tapıb.

Osmanlı qeyd edib ki, strategiya çərçivəsində ölkənin İKT sektorunun həcminin hazırkı 2,5 milyard dollardan iki dəfə artırılması və Azərbaycanın regional rəqəmsal haba çevrilməsi nəzərdə tutulur.

Onun sözlərinə görə, proqramın əsas istiqamətləri rəqəmsallaşmanın sürətləndirilməsi, süni intellekt, innovasiyalar və kibertəhlükəsizlik sahələrinin inkişafıdır.

Agentlik rəhbəri bildirib ki, bu prosesdə My.gov platforması əsas rəqəmsal infrastruktur rolunu oynayacaq. Son bir ildə platformanın istifadəçi bazası təxminən üç dəfə artaraq 1,7 milyonu keçib, təqdim olunan xidmətlərin sayı isə 11 dəfə artıb.

Osmanlı əlavə edib ki, yaxın vaxtlarda beynəlxalq maliyyə institutları ilə geniş əməkdaşlıq paketinin tamamlanması, startapların, vençur fondlarının və texnoparkların inkişafını dəstəkləyən yeni mexanizmlərin tətbiqi planlaşdırılır.

N.Təbrizli