İyulda nə qədər ərazi minadan təmizlənib?

İyulda işğaldan azad edilmiş ərazilərdə 8 012,7 hektar sahə mina və partlamamış hərbi sursatlardan təmizlənib. Bu barədə Azərbaycan Minatəmizləmə Agentliyinin (ANAMA) işğaldan azad edilmiş ərazilərdə həyata keçirilən humanitar minatəmizləmə əməliyyatlarına dair aylıq məlumatında bildirilib.

Məlumata görə, hesabat dövründə 614 piyada əleyhinə mina, 174 tank əleyhinə mina və 2 106 partlamamış hərbi sursat (PHS) aşkarlanaraq zərərsizləşdirilib.

ANAMA qeyd edib ki, minatəmizləmə işləri işğaldan azad olunmuş ərazilərdə təhlükəsiz yaşayışın təmin edilməsi, bərpa-quruculuq layihələrinin həyata keçirilməsi və məcburi köçkünlərin doğma yurdlarına qayıdışının sürətləndirilməsi məqsədilə fasiləsiz davam etdirilir.

Azərbaycan işğaldan azad edilmiş ərazilərdə genişmiqyaslı humanitar minatəmizləmə işlərini bərpa və yenidənqurma prosesinin əsas istiqamətlərindən biri hesab edir. Rəsmi statistikaya görə, Azərbaycanda mina qurbanlarının sayı 3 400 nəfəri ötür. Onlardan 359-u uşaq, 38-i isə qadındır.

Təkcə 2020-ci ildə başa çatan İkinci Qarabağ müharibəsindən sonra mina partlayışları nəticəsində 382 nəfər zərər çəkib. Onlardan 55 nəfər həlak olub, 143 nəfəri isə mülki şəxslərdir.

Qlobal statistikaya əsasən, mina qurbanlarının 84%-ni mülki şəxslər təşkil edir. Mülki qurbanların 37%-i uşaqlar, ümumi mina qurbanlarının isə 81%-i kişilər və oğlan uşaqlarıdır.

Gülnar Nazimqızı