Nazirlər Kabineti məxfi məlumatlı əməkdaşların sığorta uçotu ilə bağlı yeni qaydaları təsdiqlədi

Qərarla "Sığortalıların təqdim etdiyi məlumatlar əsasında sığorta olunanların və sığortalıların sığortaçıda uçotu Qaydası" təsdiqlənib. Sənəd sığortalıların təqdim etdiyi məlumatlar əsasında sığorta olunanların və sığortalıların sığortaçıda uçotunun təşkilati və hüquqi əsaslarını müəyyən edir.

Qaydaya əsasən, sığortaçıda sığortalılar barədə ad, VÖEN, hüquqi və faktiki ünvan, əlaqə nömrəsi, icbari sığortanın tətbiqinə başlanma tarixi, yenidən təşkil və ləğv tarixi, sığorta haqları, artıq ödənilmiş məbləğlər və digər məlumatlar uçota alınacaq.

Yeni qayda ilə yanaşı, barələrində məlumatların məxfiləşdirilməsi nəzərdə tutulan sığorta olunanlara unikal kodun verilməsi proseduru da müəyyən edilib.

Bu mexanizm Daxili İşlər Nazirliyi, Dövlət Təhlükəsizliyi Xidməti, Xarici Kəşfiyyat Xidməti, Dövlət Mühafizə Xidməti və Xüsusi Rabitə və İnformasiya Təhlükəsizliyi Dövlət Xidmətinin, eləcə də "Dövlət sirri haqqında" qanuna uyğun olaraq məlumatları məxfiləşdirilən mülki əməkdaşlarına şamil edilir.

Qaydaya əsasən, həmin qurumlar işə qəbul edilən əməkdaşlar üçün onların işə başladığı tarixdən etibarən 5 iş günü ərzində Dövlət Sosial Müdafiə Fonduna müraciət etməlidirlər. Fond müraciətə 15 iş günü ərzində baxaraq hər bir əməkdaş üçün unikal kod təqdim edəcək.

Əmək münasibətlərinə xitam verildikdə isə həmin unikal kodun ləğvi üçün sığortalı tərəfindən Fonda yazılı müraciət göndərilməlidir.

Nazirlər Kabinetinin qərarına əsasən, Daxili İşlər Nazirliyi, Dövlət Təhlükəsizliyi Xidməti, Xarici Kəşfiyyat Xidməti, Dövlət Mühafizə Xidməti və Xüsusi Rabitə və İnformasiya Təhlükəsizliyi Dövlət Xidməti qərarın qüvvəyə mindiyi tarixdən 15 iş günü ərzində məxfi məlumatlı əməkdaşlar üçün unikal kodların verilməsi məqsədilə Dövlət Sosial Müdafiə Fonduna müraciət etməlidirlər. Əmək və Əhalinin Sosial Müdafiəsi Nazirliyi isə daxil olan müraciətlər əsasında 1 ay müddətində həmin şəxslərə unikal kodların verilməsini təmin edəcək.