SOCAR insan kapitalının inkişafına yatırımları artırır

SOCAR insan kapitalının inkişafı çərçivəsində əməkdaşların beynəlxalq təhsil və təcrübə imkanlarının genişləndirilməsinə diqqət yetirir. Bunu SOCAR-ın vitse-prezidenti Zaur Qurbanov ADA Universitetində Liderlik və İnnovasiya üzrə IE Mərkəzinin “AZEMBA” proqramının açılışında deyib.

O bildirib ki, SOCAR-ın dəstəyi ilə həyata keçirilən “Global MBA” proqramına şirkətin 16 əməkdaşı və xarici bazardan rəqabətli seçimlə müəyyənləşdirilmiş 8 iştirakçı qoşulub.

“Proqram böyük maraqla qarşılandı və yüksək ixtisaslı mütəxəssislərdən yüzlərlə müraciət daxil oldu”, -Qurbanov bildirib.

Onun sözlərinə görə, SOCAR 15-dən çox ölkədə fəaliyyət göstərir və 70 mindən çox əməkdaşı var. Şirkətin transformasiyasında insan kapitalının inkişafı əsas istiqamətlərdən biridir.

Zaur Qurbanov qeyd edib ki, SOCAR beynəlxalq tərəfdaşlarla bilik və təcrübə mübadiləsini də genişləndirir. O, GIZ, Yaponiyanın JCCCP və Türkiyənin TPAO şirkəti ilə həyata keçirilən təhsil və peşəkar inkişaf layihələrini nümunə göstərib.

Vitse-prezident bildirib ki, SOCAR-ın “Xaricdə Təhsil Təqaüd Proqramı” çərçivəsində indiyədək 380 iştirakçı dəstəklənib. Onlardan 18-i “Chicago Booth”, “IMD”, “IE University” və “Columbia Business School” kimi universitetlərdə “Executive MBA” proqramlarını bitirib və ya hazırda təhsil alır.

O əlavə edib ki, SOCAR “IMD”, “Klaus University”, “Sabancı University” və “Duke University” ilə əməkdaşlığı genişləndirir, həmçinin ADA Universiteti, Qarabağ Universiteti və Sumqayıt Dövlət Universiteti ilə tərəfdaşlıq edir.

Aytac