İlham Əliyev Çin və İtaliya şirkətlərinin rəhbərləri ilə görüşüb

Azərbaycan Prezidenti İlham Əliyev sentyabrın 24-də Çinin “01.AI” və “Sinovation Ventures” şirkətlərinin baş icraçı direktoru Kei-Fu Lini və İtaliyanın “TEHA Group” şirkətinin nümayəndəsi Filippo Malinvernonu qəbul edib.

Görüşdə Azərbaycanda investisiya imkanları, süni intellekt və müxtəlif sahələrdə əməkdaşlıq məsələləri müzakirə olunub.

Qonaqlar Bakıda Prezident İlham Əliyevin himayəsi altında keçiriləcək İkinci Azərbaycan Beynəlxalq İnvestisiya Forumunda iştirak edəcəklərini bildiriblər.

İlham Əliyev Azərbaycanın Çin və İtaliya ilə sıx münasibətlərinin olduğunu və hər iki ölkədən olan iş adamlarının Azərbaycana sərmayə yatırdığını qeyd edib.

Görüşdə Azərbaycanın 2025–2028-ci illər üçün süni intellekt strategiyasının təsdiq edildiyi xatırlanıb. Ölkədə yaradılmış biznes mühiti və xarici investorlar üçün imkanlar barədə də fikir mübadiləsi aparılıb.

Tərəflər yaşıl enerji, kibertəhlükəsizlik, təhsil və digər sahələrdə süni intellektin tətbiqi, eləcə də Azərbaycanla sözügedən şirkətlər arasında əməkdaşlıq imkanlarını müzakirə ediblər.