Azərbaycan XİN və müadafiə naziri Qazaxıstanda hərbçilərin ölümü ilə bağlı başsağlığı verib

Azərbaycan Xarici İşlər Nazirliyi (XİN) Qazaxıstanın Xəzər dənizində keçirdiyi hərbi təlim zamanı hərbçilərin həlak olması ilə bağlı başsağlığı verib.

Qazaxıstan Müdafiə Nazirliyinin məlumatına görə, sentyabrın 24-də Aktaudan 43 kilometr məsafədə keçirilən hərbi-dəniz təlimləri zamanı hava şəraitinin kəskin pisləşməsi nəticəsində dalğa 19 hərbçini dənizə aparıb. Hadisə nəticəsində 9 hərbçi həlak olub, 3 nəfər xilas edilib, 7 hərbçinin axtarışları davam etdirilir.

Hadisə ilə bağlı Azərbaycan müdafiə naziri general-polkovnik Zakir Həsənov da Qazaxıstanın müdafiə naziri general-leytenant Dauren Kosanova başsağlığı məktubu ünvanlayıb.

Həsənov başsağlığında həlak olan hərbçilərin yaxınlarına dərin hüznlə başsağlığı verib, yaralanan hərbi qulluqçuya şəfa diləyib və itkinlərin axtarış-xilasetmə əməliyyatlarının müsbət nəticələnəcəyinə ümid etdiyini bildirib.

Azərbaycan XİN-in “X” sosial media hesabında da hadisə ilə bağlı dərin kədər ifadə olunub.

“Həlak olan hərbçilərin ailələrinə və yaxınlarına, eləcə də qardaş Qazaxıstan xalqına və hökumətinə dərin hüznlə başsağlığı veririk. Allah dünyasını dəyişənlərə rəhmət eləsin, onların ailələrinə bu ağır günlərdə güc və səbir versin. Hazırda itkin düşənlərin sağ-salamat xilas ediləcəyinə ümid edir, yaralanan hərbçiyə isə tezliklə şəfa diləyirik”, - XİN bildirib.

Qazaxıstanın axtarış-xilasetmə əməliyyatlarına dörd hərbi gəmi, Mi-8 helikopteri və Fövqəladə Hallar Nazirliyinin qüvvələri cəlb olunub.