QMİ: Həcc ziyarəti üçün kvotanın 15 faizi tamamlanıb

Həcc ziyarətinə sənəd qəbulu kvota dolanadək davam edəcək. Bu barədə Qafqaz Müsəlmanları İdarəsinin Xarici Əlaqələr şöbəsinin müdiri və Həcc Elektron Sistem rəhbəri Vüsal Cahangiri məlumat verib.

O bildirib ki, bu, təxminən, yanvar ayına təsadüf edəcək.

Vüsal Cahangirinin sözlərinə görə, Həcc ziyarəti üçün ayrılan kvotanın 15 faizi tamamlanıb.

“İlkin olaraq QMİ bir nəfər üçün ziyarət paketinin qiymətini ötən ildə olduğu kimi 6100 ABŞ dolları müəyyən edib. Ancaq bundan əvvəl bildirdiyimiz kimi məbləğ az miqdarda arta da bilər”, - Vüsal Cahangiri bildirib.

Həcc ziyarəti üçün ümumvətəndaş pasportu (ən azı 1 il vaxtı olmalıdır), şəxsiyyət vəsiqəsinin surəti,
5 sm × 5 sm ölçüdə 2 ədəd ağ fonda çəkilmiş rəngli fotoşəkil (qadınlar tünd hicabda),
sağlamlıq haqqında arayış tələb olunur.

Sənədlərin qəbulu iş günləri ərzində saat 10:00-dan 16:00-a kimi Qafqaz Müsəlmanları İdarəsinin Bakı şəhəri, Mirzə Fətəli küçəsi 7 ünvanında yerləşən inzibati binasında aparılır.

Bu il Həcc ziyarətinə sənəd qəbulu sentyabrın 24-ü başlayıb.