Azərbaycan CNN-in materialı ilə bağlı ABŞ məhkəmə sisteminə müraciət edib

Azərbaycan Prezidentinin köməkçisi Hikmət Hacıyev Bakının dezinformasiya hesab etdiyi və region ölkələri arasında münasibətlərə zərər vura biləcəyini bildirdiyi CNN materialı ilə əlaqədar ABŞ məhkəmə sisteminə müraciət olunduğunu deyib.

Onun sözlərinə görə, telekanal həmin materialı bir neçə ay əvvəl yayımlayıb, daha sonra Azərbaycan tərəfinin cavab haqqı və təkzib tələblərini rədd edib.

“Biz ABŞ məhkəmə sisteminə müraciət etdik, lakin təəssüf ki, prosesin irəliləməsi üçün perspektiv görmürük”, — Hacıyev ingilis dilində çıxışında bildirib.

O, hansı materialdan söhbət getdiyini, müraciətin hansı məhkəməyə ünvanlandığını və rəsmi iddia qaldırılıb-qaldırılmadığını açıqlamayıb.

Hacıyev deyib ki, dezinformasiyanın yayılması yalnız sosial şəbəkələrlə məhdudlaşmır, peşəkar mediada da belə hallara rast gəlinir. Onun qiymətləndirməsinə görə, süni intellekt və rəqəmsal platformalar dezinformasiyanın yayılmasını sürətləndirir, bu isə dövlətlərə və cəmiyyətlərə qarşı hibrid təsir vasitəsinə çevrilir.

O, rəqəmsal təhdidlər nəzərə alınmaqla dövlətlərin daxili işlərinə qarışmamaq prinsipinin tətbiqinə yenidən baxılmasını təklif edib. Hacıyev başqa ölkəyə fiziki müdaxilə olmadan, uzaq məsafədən müxtəlif vasitələrlə təsir göstərməyin mümkün olduğunu vurğulayıb.

Azərbaycanla Ermənistan arasında sülh prosesinə toxunan Hacıyev iki ölkənin cəmiyyətlərini bu prosesi pozmaq cəhdlərinə birgə qarşı çıxmağa çağırıb. O, bəzi erməni diaspor dairələrini Qarabağ məsələsindən sülh gündəliyinə qarşı istifadə etməkdə ittiham edib.

Gülnar Nazimqızı