Qurban Qurbanov: “Rudar” komandası ilə oyun bizim üçün çox vacibdir

"Rudar" komandası ilə oyun bizim üçün çox vacibdir. Ona görə də komandanı ən yüksək səviyyədə hazırlamağa çalışdıq.

AZƏRTAC xəbər verir ki, bu sözləri iyulun 15-də Tofiq Bəhramov adına Respublika stadionunda Çempionlar Liqası yarışlarının ikinci təsnifat mərhələsi çərçivəsində Monteneqronun "Rudar” komandasını qəbul edəcək "Qarabağ” futbol klubunun baş məşqçisi Qurban Qurbanov deyib.

"Rudar”ın oyununu təhlil etdiklərini vurğulayan baş məşqçi bildirib ki, rəqib komandada heyət dəyişib və güclənib. Rəqibin oyun üslubu bizə problem yarada bilər. Bu komandanı yalnız ilk oyundan sonra tam yaxşı tanıyacağıq. İkinci oyunda isə işimiz bir qədər yüngül olacaq. Buna görə də ilk oyunda mümkün qədər az səhvə yol verməliyik.

Hücumçu probleminin gec həll olunmasının planlara təsir göstərməyəcəyini bildirən Qurban Qurbanov yaxşı futbolçu tapmağın çətinliyini vurğulayıb. Qeyd edib ki, Türkiyədə legionerlərə qoyulan hədd aradan götürülüb. Bu səbəbdən bizə həm az legioner təklif olundu, həm də azad agent statusu daşıyanlar çox azdır. Əsas odur ki, transfer etdiyimiz Raydel Pupon komandamıza uyğun gəlsin.

Rəqibin Reynaldodan ehtiyatlandığını və bunun normal olduğunu deyən baş məşqçi bildirib ki, digər futbolçularımız da oyun keyfiyyətlərini yaxşılaşdırmağa cəhd etməlidirlar. Futbolçu bunu özü də başa düşməlidir.

"Rudar” – "Qarabağ” görüşünü rumıniyalı referi Sebastyan Koltesku idarə edəcək. Ona Radu Adrian Ştefan Ginquleak, Mircea Mixail Qriqoriu və George Katalin Qaman kömək edəcəklər. Oyunun hakim-inspektoru Volodimir Petrov (Ukrayna), UEFA nümayəndəsi isə İvan Borissov Lekov (Bolqarıstan) olacaq.
www.ann.az