Moskvada Vüqar Həşimovun xatirəsinə şahmat turniri keçirilib – FOTO

Moskva Millətlər Evində baş tutan turniri Azərbaycan Mədəniyyətinin İnkişafı və İntibahı Fondu, eləcə də Yeni Nəfəs Hərəkatı Moskva nümayəndəliyi təşkil edib. 

Yeni Nəfəs Hərəkatı Moskva Nümayəndəliyindən ANN.Az-a verilən məlumata görə, əvvəlcə turnir iştirakçıları və tədbirin qonaqları mərhum Vüqar Həşimovun xatirəsini bir dəqiqəlik sükutla yad ediblər.

Azərbaycanın Rusiyadakı səfirliyinin diaspor və beynəlxalq hüquq məsələləri üzrə müşaviri Aqşin Əliyev, Bakıdan turnirin açılışına təşrif buyurmuş qonaq, Azərbaycan Gənclərinin Avropaya İnteqrasiyası Təşkilatının sədri Gülsel Səfərova, Azərbaycan Mədəniyyətinin İnkişafı və İntibahı Fondunun prezidenti Şamil Tağıyev, Yeni Nəfəs Hərəkatı Moskva nümayəndəliyinin rəhbəri Toğrul Allahverdili çıxış edərək turnirin keçirilmə əhəmiyyətindən bəhs ediblər.

Yeni Nəfəs Hərəkatı Moskva nümayəndəliyinin rəhbəri Toğrul Allahverdili Azərbaycanı Rusiya Federasiyasında layiqli təmsil etdiyinə və şahmat turnirinin keçirilməsində təşkilatçılığa görə Azərbaycan Mədəniyyətinin İnkişafı və İntibahı Fondunu diplomla təltif edib.

Rəsmi çıxışlardan sonra turnirə start verilib, 40 yaşadək 30 nəfərə yaxın şahmatçı güclərini sınayıblar. Oyunların nəticələrinə görə isə turnirdə birinci yeri Kalmıkiya təmsilçisi Andrey Ubuştevə nəsib olub, ikinci və üçüncü yerləri müvafiq olaraq Baykaldan olan Bato Şoyjinimayev və moskvalı FİDE ustası Konstantin Kostin tutdular. Qaliblər turnirin kubokları və diplomlarla mükafatlandırılıblar.