Ukraynanın yeni prezidentinin adı necə yazılmalıdır?

Xəbər verildiyi kimi, 25 mayda Ukraynada prezident seçkiləri keçirildi. Dünya, o cümlədən Azərbaycan mətbuatının Petro yaxud Pyotr Poroşenko kimi təqdim etdiyi şəxs Ukraynanın yeni prezidenti seçildi. Keçən bu müddət ərzində Ukraynanın yeni prezidentinin adı ətrafında müzakirələr isə getdikcə artmaqdadır.

Maraqlıdır ki, onun adının hər iki variantı ətrafında müzakirələrə qoşulan tərəflərin ciddi arqumentləri var. Hətta sosial şəbəkələrdə, mətbuatda bu mövzu ətrafında aparılan müzakirələrdə münaqişə halları da ortaya çıxıb.

Dilçi alimlərimizin bu mövzu ətrafında fikirlərini aldıq. 

Dilçi alim Ədalət Tahirzadə Poroşenkonun adının “Petro” adının doğru olduğunu düşünür: “Adlara Ukrayna və Rusiya dillərində yazılışına görə baxmaq lazımdır. Ukrayna dilində bu ad orijinalda Petrodur. Amma rus dilinə çevirəndə ada uyğun olaraq, Pyotr yazılır. Ona görə də, onun adı Petrodur. Biz bu adı necə yazmalıyıq? Əlbəttə hər bir adı orijinalda olduğu kimi, yazmaq lazımdır. Prezidentin rəsmi saytına, facebook səhifəsinə baxsaq görərik ki, Petro yazılıb. Deməli bu şəkildə yazmaq daha doğrudur”.

Tanınmış araşdırmaçı - jurnalist Rəsul Mirhəşimli hesab edir ki, dövlətimizin rəsmi sənədlərində bu ad necə yazılırsa, o, əsas götürülməlidir: “  Ukrayna prezidentinin adını rusdilli mətbuat Pyotr şəklində yazır. Yeni prezidentin adı isə bizdə gah Pyotr, gah da Petro şəklində yazılır.

Bu yazılış təbii ki, oxucuları da çaşdırır. İndi dünya dilləri o qədər dinamik şəkildə inkişaf edir ki, istənilən dilə hər an yeni sözlər daxil ola bilər. Ukraynanın yeni prezidentini adı ilə Azərbaycan mətbuatı hansı variantın doğru olduğunu öyrənmək istəyirsə, bunun dəqiq həllini təkcə dilçilərdən gözləməli deyil. Azərbaycanın rəsmi sənədlərində Ukraynanın yeni prezidentinin adı və soyadı Pyotr Poroşenko kimi yazılır. Məncə, bu yetərlidir ki, mətbuat da bu amili əsas götürsün”.

Buradan belə nəticə çıxır ki, jurnalistlər Ukrayna prezidentinin adını bundan sonra da iki variantda yazmaqda davam edəcəklər.