Ukraynada təhsil alan xarici tələbələrə XƏBƏRDARLIQ

Azərbaycanın Ukraynadakı səfirliyindən ANN.Az-a verilən məlumata görə, müşavirədə Ukraynada təhlükəsizlik məsələləri müzakirə edilib, təhsil alan xarici tələbələrin öz ölkələrinə daha tez qayıtmaq imkanı əldə etmələri məqsədilə imtahan sessiyalarının mayın 20-dək başa çatdırılması üçün şərait yaradılacağı bildirilib. Bu qərar Təhsil və Elm Nazirliyinin və Ukrayna Ali Radasının Elm və təhsil məsələləri komitəsinin birgə müşavirəsində qəbul edilib. Müşavirədə Azərbaycan səfirliyinin nümayəndələri də iştirak ediblər.

 

Təhsil və Elm Nazirliyi bu barədə mülkiyyət və tabelik formasından asılı olmayaraq bütün ali məktəblərin rəhbərlərinə məktub ünvanlayıb. Nazirliyin məlumatında deyilir: “Nazirlik başqa dövlətlərin diplomatik müəssisələrinin nümayəndələrinin müraciətlərini nəzərə alaraq, mülkiyyət və tabelik formalarından asılı olmayaraq, bütün ali məktəblərə gündüz bölmələrində təhsil alan, yaxud hazırlıq fakültələrində oxuyan xarici tələbələr üçün 2013/2014-cü tədris ilinin yay imtahan sessiyasının 2014-cü il mayın 20-dək təşkil olunmasını tövsiyə edir”.

Məlumata əsasən, nazirlik Ukrayna ali təhsil müəssisələrində qiyabi oxuyan xarici tələbələr üçün yay imtahan sessiyasını və xarici tələbələrin son attestasiyasının 2014-cü ilin sentyabr ayına keçirilməsini tövsiyə edib, həmçinin Krımın ali təhsil müəssisələrində oxuyan xarici tələbələrin arzusu ilə onların Ukrayna ali təhsil müəssisələrinə keçirilməsinin təmin olunmasını xahiş ediblər.