Kiyevdə müxalifətin aksiyasına 200 min adam toplaşıb

Ukraynanın paytaxtı Kiyevdə müxalifətin növbəti kütləvi nümayişi keçirilir. Müstəqillik meydanında keçirilən aksiyaya azı 200 min adamın qoşulduğu bildirilir. Etirazçılar prezident Viktor Yanukoviçin Avropa Birliyi ilə assosiasiya sazişinin imzalamasını gözləyirlər. Maydana Kiyevlə yanaşı, ölkənin başqa şəhərlərindən də gələnlər az deyil. Onların arasında gənclər və tələbələr çoxluq təşkil edir. 

Eyni zamanda, Ukrayna prezidenti Viktor Yanukoviçin tərəfdarları da Mariinsk parkında aksiya keçirirlər. Hökumət-lehinə mitinqin iştirakçıları əllərində "Ukrayna - Maydan deyil", "Faşizm işə yaramayacaq" kimi şüarların yazıldığı plakatlar tutublar. 

Bu arada, Avropa Birliyi Ukrayna ilə ticarət və əməkdaşlıq razılaşması ilə bağlı işlərin müvəqqəti olaraq dayandırıldığını bəyan edib. "Reuters" agentliyinin Avropa Birliyinin Genişləndirmə üzrə ali komissarı Ştefan Füleyə istinadən verdiyi məlumata görə, təşkilat bu qərarını «Kiyevin irəli sürdüyü arqumentlərin reallığa əsaslanmaması» ilə izah edib.

Reuters