Kaliforniya Trampı məhkəməyə verib

Kaliforniya ştatı və qubernator Gevin Nyusom ABŞ prezidenti Donald Trampı məhkəməyə verib. Onlar Trampı Milli Qvardiyanın Los-Ancelesə göndərilməsi ilə Konstitusiyanı və federal qanunları pozmaqda ittiham edirlər.

San-Fransiskodakı federal məhkəməyə təqdim olunan iddiada Trampın göstərişi "misli görünməmiş səlahiyyət ələ keçirmə" kimi qiymətləndirilir və ştatın suverenliyinə təhdid olduğu bildirilir.

Tramp isə buna cavab olaraq 1807-ci il Üsyan Qanununa istinad edib və bəzi Los-Anceles rayonlarında baş verənləri "qiyam" adlandırıb.

Prezident əlavə qoşun göndəriləcəyini istisna etməyib və Nyusomu bacarıqsız adlandırıb.

İyunun 6-dan etibarən ICE tərəfindən qeyri-qanuni miqrantların saxlanılması ilə başlayan hadisələr etirazlara səbəb olub. Etirazlar tezliklə iğtişaşlara çevrilib.

Bütün ölkə üzrə 170-dən çox şəxs saxlanılıb. Trampın göstərişi ilə Kaliforniyaya 2000 Milli Qvardiya əsgəri və 700 dəniz piyadası göndərilib.

Qubernator Nyusom bu addımı "avtoritarizmə doğru addım" adlandırıb.

Los-Ancelesin meri Karen Bass ICE reydlərini "lazımsız və dağıdıcı" adlandırıb.

ABŞ Daxili Təhlükəsizlik Nazirliyi isə iğtişaşların təşkilində peşəkar təxribatçıların iştirak etdiyini iddia edib.

N.Təbrizli