22, 31 və 78 saylı Seçki dairələrindən daxil olan şikayətlər ciddi şəkildə araşdırılacaq. Bunu Mərkəzi Seçki Komissiyasının (MSK) bu gün keçirilən iclasında MSK sədri Məzahir Pənahov bildirib.
"Əgər hansısa mübahisəli məqam varsa, heç nədən çəkinmədən MSK buna aydınlıq gətirib qərar verəcək. Biz qarşıdakı günlərdə həmin şikayətlərin araşdırma nəticələrini MSK-nın iclasında müzakirəyə çıxaracağıq. 22, 31 və 78 saylı Seçki dairələrindən daxil olan şikayətlər ciddi şəkildə araşdırılacaq", - sədr əlavə edib.
22 nömrəli seçki dairəsindən Asim Mollazadə, 31 nömrəlidən Qaya Məmmədov, 78 saylı dairədən isə Vüqar Bayramovun qələbə çaldığı bildirilib.
MSK sədrinin müavini Rövzət Qasımovun sözlərinə görə isə, sosial şəbəkələrdə son parlament seçkiləri ilə bağlı baş verən hadisələri əks etdirən 25 seçki dairəsinin 49 məntəqəsində çəkilən 508 görüntü yayımlanıb.
MSK sədri Məzahir Pənahov həmin görüntülərin izlənməsi üçün bir gün tələb olunduğunu deyib.
"Sentyabrın 11-i keçiriləcək iclasda bəzi görüntüləri müzakirə edə biləcəyik", - Pənahov bildirib.
Onun sözlərinə görə, MSK-ya bütün məntəqələr üzrə daxil olan videolar ayrı-ayrılıqda ekspert qrupu üzvlərinə təqdim ediləcək.
Məntəqələrdən görüntüləri araşdırmaq MSK üzvləri Hüseyn Paşayev, Qabil Orucov, Fuad Cavadov və Baxşeyiş Əsgərova həvalə olunub.
N.Təbrizli
www.anews.az
Bizi sosial şəbəkələrdə izləyin !
