Maskın rəhbərlik etdiyi qurum fəaliyyətini dayandırıb

ABŞ-də Hökumətin Səmərəliliyinin Artırılması Departamenti (DOGE) fəaliyyətini dayandırıb.Bu barədə “Reuters” məlumat yayıb.

Bildirilib ki, departamentin fəaliyyət müddətinin başa çatmasına hələ 8 ay qalsa da, struktur artıq mövcud deyil.

Məlumata əsasən, ABŞ Federal Hökumətinin kadr xidmətinin rəhbəri Skott Kuper departamentin hökumət qurumu statusunu itirdiyini açıqlayıb. Onun sözlərinə görə, quruma məxsus bir çox səlahiyyətlər bundan sonra Şəxsi Heyətin İdarə Edilməsi Xidməti tərəfindən icra olunacaq.

Sözügedən departament bu ilin yanvar ayında yaradılmışdı. Amerikalı milyarder İlon Maskın rəhbərlik etdiyi qurum onun may ayında vəzifəsindən istefa verməsindən sonra formal şəkildə fəaliyyət göstərirdi.