4-13 fevral 2015-ci tarixlərində, BMT-nin baş qərargahında keçirilən sessiyanın məqsədi 2015-2016-cı illərdə dünyada sosial inkişafın gücləndirilməsi və yeni hədəflərin müəyyən edilməsidir.

BMT Komissiyasının 53-cü sessiyası ali və ümumi panel müzakirələri, işçi qrupların iclasları və ictimai müzakirələrdən ibarət olmaqla təşkil olunub. Sessiya çərçivəsində tədbirlər və fəaliyyət prioritet mövzu olan "Müasir dünyada sosial inkişafın təkrar düşünülməsi və gücləndirilməsi” ətrafında qurulub. Bununla yanaşı tədbir zamanı iqtisadi və sosial problemlər, sosial inkişaf hədəflərinin minilliyin inkişaf planına salınmasına dair müzakirələr təşkil edilmiş, sözü gedən mövzular ətrafında bir sıra ölkələrin təcrübələri dinlənilmişdir.

Səfər çərçivəsində, ARGTMŞ-ın Baş Katibi Seymur Hüseynov və Dünya Gənclər Assambleyasının (WAY) Baş Katibi xanım Ediola Pashollari arasında iki tərəfli görüşlər keçirilmişdir. Görüşlərdə hər iki qurum arasında əməkdaşlıq formatları, qlobal gənclər və sosial siyasət məsələləri müzakirə edilmiş, 2015-ci il ərzində birgə layihə və proqramların həyata keçirilməsinə dair qərar verilib.

Məlumat üçün qeyd edək ki, Sosial İnkişaf üzrə Komissiya 1946-cı ildən fəaliyyət göstərir və BMT-nin İqtisadi və Sosial Şurası (ECOSOC) tərəfindən yaradılmış 10 əsas qurumdan biridir.