AXCP üzvü Cəfər Mirzəyev 6 il müddətinə azadlıqdan məhrum edilib

16:20 | 17.01.2023
Almaniyadan Bakıya deportasiya olunandan az sonra həbs edilən siyasi fəal Cəfər Mirzəyev 6 il azadlıqdan məhrum edilib. Bu barədə Meydan Tv- də məlumat yayılıb.
 
Hakim Cavid Hüseynovun sədrliyi ilə keçirilən prosesinə əsasən, bir ildir həbsdə olan Cəfər Mirzəyevin üstündən təxminən 6 qram narkotik tapıldığı iddia olunur. İddia edilir ki, həmin narkotik maddəni o, satış məqsədilə əldə edib, daşıyıb.

Cəfər Mirzəyev bu iddiaları rədd edərək, bildirir ki, onu sosial mediada məmur özbaşınalığı haqda paylaşımlarına, Almaniyada olarkən Azərbaycandakı siyasi məhbuslarla bağlı etiraz aksiyalarında iştirakına görə cəzalandırıblar.
 
Məhkəmə iclasında Cəfər Mirzəyev son söz ilə çıxış edib. O, istintaq dövründə ona edilən işgəncələr barəsində danışıb. AXCP üzvü ittihamın onun siyasi fəaliyyəti ilə bağlı olduğunu deyib.

Prosesdə iştirak edən hüquq müdafiəçisi Zəfər Əhmədov hökmün siyasi sifariş olduğunu vurğulayıb.

Cəfər Mirzəyev 2021-ci ilin noyabrında Almaniyadan Azərbaycana deportasiya olunub, 2022-ci ilin yanvarında isə həbs olunub. O, 2021-ci ilin oktyabrından indiyədək Almaniyadan deportasiya edildikdən az sonra həbs edilən 6 nəfər siyasi fəaldan biridir. 

Daxili İşlər Nazirliyi isə onların bu haqda dediklərinin əsassız olduğunu, konkret cinayətə görə həbs olunduqlarını bildirib.
 
Aytac Zeynalova


www.anews.az
0
Bizi sosial şəbəkələrdə izləyin !

REKLAM

Xəbər lenti