Minneapolisdə Kardiologiya İnstitutunun elmi əməkdaşları gəncləri sağlamlıqlarının qayğısına qalmağa və bacardıqları qədər çoxlu tərəvəz, meyvə yeməyə çağırırlar. Bu məlumatı AZƏRTAC İnforming saytına istinadla verir.

Tədqiqatın müəllifi Mişel Midema deyir: "Düzgün qidalanmaq üçün qocalığı gözləmək lazım deyil. Yadınızda saxlayın ki, sağlamlığın təməli gənc yaşlarında qoyulur və insanın qida rasionu onun qocalıqda ürək-damar sisteminin vəziyyətinə təsir göstərir”.

Qeyd edək ki, bir qrup alim öz tədqiqatına 1985-ci ildən başlayıb. Bu müddət ərzində mütəxəssislər könüllülərin həyat tərzi və nə ilə qidalanmaları haqqında məlumat toplayıblar. Məlum olub ki, gündəlik tərəvəz və meyvə yeyən iştirakçılar ürək-damar sistemin problemlərindən daha az əziyyət çəkiblər.

Alimlər əldə edilmiş məlumatlara əsasən gənclərin qoca yaşlarında sağlamlıqla bağlı ciddi problemlər yaşamamaları üçün rasionlarına tərəvəz və meyvələr daxil etməyi məsləhət görürlər.