Qarabağda tibbi infrastrukturun genişləndirilməsi sürətlə davam edir – TƏBİB

TƏBİB-in İcraçı direktoru Vüqar Qurbanov, Prezident İlham Əliyev və Birinci vitse-prezident Mehriban Əliyevanın nəzarəti altında Qarabağ və Şərqi Zəngəzurda tibbi xidmətin gücləndirilməsinin strateji prioritet olduğunu bildirib. Bu barədə o, səhiyyə sahəsində keçirilmiş müşavirədə çıxışı zamanı danışıb.

“Dövlət siyasətinə uyğun olaraq vətəndaşlarımız doğma torpaqlarına qayıdır. Biz isə bu dinamikanı dəstəkləmək üçün tibbi xidmətin təşkilində maksimum səylə çalışırıq,” – Qurbanov vurğulayıb.

TƏBİB-in İxtisaslı tibbi xidmətlərin təşkili departamentinin rəhbəri Nəzrin Mustafayeva bildirib ki, hazırda Ağalı, Laçın və Xocalıda tibb məntəqələri fəaliyyət göstərir. Şuşa, Füzuli və Zəngilanda isə modul tipli xəstəxanaların tikintisi aparılır. Gələcəkdə digər rayonlarda da yeni tibb müəssisələrinin qurulması planlaşdırılır.

“Uzun illər tibbi infrastrukturun mövcud olmadığı bu ərazilərdə indi sürətli, dayanıqlı və keyfiyyətli xidmətin təmin edilməsi əsas prioritetimizdir,” – Mustafayeva qeyd edib.

Müşavirədə təcili tibbi yardım xidmətləri ilə bağlı da islahatların davam etdiyi bildirilib.

Gülnar Nazimqızı