ŞƏT ölkələri BMT-də islahatların aparılmasını zəruri hesab edir

Çinin Tyantszin şəhərində keçirilən Şanxay Əməkdaşlıq Təşkilatının (ŞƏT) sammitində üzv dövlətlər BMT-nin islahata ehtiyacı olduğunu bildiriblər. Bu barədə sammitdə qəbul olunmuş bəyannamədə qeyd olunur. 

“Onlar inkişaf etməkdə olan ölkələrin BMT orqanlarında daha geniş təmsil olunması üçün yaxşı düşünülmüş islahatların aparılmasını və BMT-nin müasir siyasi və iqtisadi reallıqlara uyğunlaşdırılmasını zəruri hesab edirlər”, – sənəddə qeyd olunur.

BMT-nin rolu və çağırışlar

Bəyanatda BMT-nin yaradılmasının İkinci Dünya Müharibəsindən sonra beynəlxalq münasibətlərin formalaşmasında əsas meyar olduğu vurğulanıb. Bildirilib ki, təşkilat ötən 80 ildə sülhün qorunması, qlobal təhlükəsizliyin təminatı və sosial-iqtisadi inkişaf sahəsində beynəlxalq əməkdaşlığın əsas platforması olub.

ŞƏT ölkələri hesab edirlər ki, qlobal sülhün və sabitliyin təminatı yalnız BMT Nizamnaməsinə və beynəlxalq hüququn prinsiplərinə dövlətlərin qeyd-şərtsiz əməl etməsi ilə mümkündür.

Gülnar