Hazırda Azərbaycanda fahişəliyə cəlb edən 16 nəfər axtarışdadır

Azərbaycanda məhkəmələr insan alveri cinayətləri üzrə 14 nəfəri azadlıqdan məhrum etmə cəzasına məhkum edib. Bu barədə Bu barədə Milli Məclisin İnsan hüquqları, Hüquq siyasəti və dövlət quruculuğu komitələrinin bugünkü birgə iclasında müzakirə olunan insan alverinə qarşı mübarizə üzrə Milli Koordinatorun illik məlumatında öz əksini tapıb.

Məhkum olunanların 4-ü kişi, 10-u qadındır. Onlardan 3 nəfər barəsində şərti cəza tətbiq olunub. Statistikaya əvvəlki illərdən qalan 2 nəfər də daxil edilib.

Rəsmi məlumata əsasən, insan alveri, seksual xarakterli hərəkətlərə məcburetmə, uşaq pornoqrafiyasının dövriyyəsi, pornoqrafik materialların qanunsuz yayılması, fahişəliyə cəlbetmə və əxlaqsızlıq yuvalarının saxlanılması ilə bağlı yerli axtarışda olan 31 təqsirləndirilən şəxsdən 15-i saxlanılıb. Saxlanılanlar arasında 3 insan alverçisi də var.

Hazırda insan alveri cinayətində təqsirləndirilən 10 nəfərin Interpol xətti ilə beynəlxalq axtarışının davam etdiyi bildirilib.

Hüquq-mühafizə orqanlarının məlumatına görə, axtarışda olan şəxslərdən 7-nin Türkiyədə, 1-nin Pakistanda, 1-nin Rusiyada, digərinin isə Birləşmiş Ərəb Əmirliklərində gizləndiyi ehtimal olunur.

Gülnar Nazimqızı