60 yaşdan yuxarı şəxslərdə xərçəng 7,6% artıb

Azərbaycanda 60 və yuxarı yaşlı şəxslər arasında ilk dəfə bədxassəli şiş diaqnozu qoyulanların sayı 2025-ci ildə əvvəlki illə müqayisədə 7,6% artaraq 7,705 nəfərə çatıb. Bu barədə Dövlət Statistika Komitəsindən bildirilib.

2024-cü ildə bu yaş qrupunda 7,163 yeni xəstəlik halı qeydə alınıb. İllik artım 542 nəfər təşkil edib və bu, yaş qrupları arasında say baxımından ən böyük artımdır.

Yaşlı qadınlar arasında yeni diaqnozların sayı 13,1% artaraq 3,311-dən 3,744-ə, kişilər arasında isə 2,8% artaraq 3,852-dən 3,961-ə yüksəlib.

Faiz ifadəsində ən yüksək artım 35-39 yaş qrupunda qeydə alınıb. Bu qrupda yeni diaqnozların sayı 608-dən 658-ə yüksələrək 8,2% artıb.

Ölkə üzrə ilk dəfə bədxassəli şiş diaqnozu qoyulanların ümumi sayı 2025-ci ildə cüzi azalaraq 15,164-dən 15,144 nəfərə düşüb.

Kişilər arasında göstərici 7,113-dən 6,787-yə enib, qadınlar arasında isə 8,051-dən 8,357-yə yüksəlib.

Gülnar Nazimqızı