Dövlət büdcəsinin gəlirləri proqnozu 787,7 milyon manat üstələyib

Azərbaycanın dövlət büdcəsinin gəlirləri 2026-cı ilin yanvar-sentyabr aylarında 29 milyard 312,1 milyon manat təşkil edib. Bu, proqnozla müqayisədə 787,7 milyon manat və ya 2,8% çoxdur. Bu barədə Maliyyə Nazirliyi məlumat yayıb.

Nazirliyin məlumatına görə, hesabat dövründə dövlət büdcəsinin gəlirləri ötən ilin eyni dövrü ilə müqayisədə 169,7 milyon manat və ya 0,6% artıb.

Yanvar-sentyabr aylarında dövlət büdcəsinin xərcləri 25 milyard 348,2 milyon manat təşkil edib. Bu, ötən ilin müvafiq dövrü ilə müqayisədə 680 milyon manat və ya 2,8% çoxdur.

Dövlət büdcəsinin icrası nəticəsində 3 milyard 963,9 milyon manat profisit yaranıb.

Həmin dövrdə icmal büdcənin gəlirləri 36 milyard 730,8 milyon manat, xərcləri isə 30 milyard 89,9 milyon manat olub.

Məlumata görə, ilin ilk doqquz ayında xəzinədarlıq orqanları tərəfindən 984 mindən çox ödəniş tapşırığı icra edilib.

Gülnar Nazimqızı