Abadlaşdırma işlərinə 640 milyon manat ayrılması nəzərdə tutulub - nazir

Gələn il Bakı və ölkənin digər rayonlarında abadlaşdırma işləri üçün ümumilikdə 640 milyon manata yaxın vəsait nəzərdə tutulub. Bunu maliyyə naziri Sahil Babayev büdcə müzakirələri zamanı bildirib.

Onun sözlərinə görə, regionlarda yaşayış binalarının təmiri üçün təxminən 60 milyon manat vəsait müəyyən edilib.

“Yəni kifayət qədər vəsait müəyyən edilir, prioritetlik əsasında müvafiq qurumlarımız bunun icrasına baxmalıdırlar”, - Babayev qeyd edib.

Nazir dövlət investisiya proqramı çərçivəsində vəsaitlərin bölgüsünün layihələrin icra vəziyyəti dəqiqləşdirildikdən sonra aparıldığını bildirib.

Onun sözlərinə görə, Böyük Qayıdış proqramı çərçivəsində 400-dən artıq, dövlət investisiya proqramı üzrə isə təxminən eyni sayda layihə həyata keçirilir.

“İl ərzində 700-800 əhəmiyyətli investisiya layihəsi dövlət qurumlarımız tərəfindən icra olunur”, - Babayev vurğulayıb.