Azərbaycanla Ermənistan arasında son dövrdə baş verən gərgin vəziyyətlə
yanaşı həm də ölkələr arasında informasiya müharibəsi baş verir. Bu həm dövlət
səviyyəsində həm də vətəndaş mövqeyi əsnasında həyata keçir. Bəs əslində
informasiya prosesi necə həyata keçirilməlidir ki, doğruluğu təmin olunsun? Anews.az bu haqda mütəxəssislərin
fikirlərini alıb.
"Zerkalo” qəzetinin baş redaktoru Elçin Şıxlının sözlərinə görə, Azərbaycanın informasiya mübarizəsində bir xeyli naşılıqlar var. Bunun sayəsində
isə uzun müddət hansısa bir iş görənlərin əməyi puça çıxır.
"Bizdə informasiya savaşı doğru aparılmır. Məsələn, Milli
Məclisin 30 illik deputatı "Paşinyanın arvadını əsir götürdüyümüz günü gözləyirik”
deməsi ilə əslində Azərbaycan xalqına, kişisinə, ordusuna həqarət etmiş oldu.
Başqa bir deputat da çıxışında deyir ki, mən siyasətə qarışmıram. Əgər siyasətə
qarışmıyacaqsansa parlamentdə nə işin var?! Əgər bunlar
informasiya müharibəsidirsə o zaman biz yerin dibindəyik".
Elçin
Şıxlı onu da bildirdi ki, Azərbaycan parlamenti heyətinin Lavrovla görüşdə dediklərini sonradan silməsi də səhv idi. "Bu o anlama gəlir ki, biz nədənsə qorxub
çəkindik. Nəticədə ermənilər bizim yazdığımız ilkin xəbəri skreeenshot edərək
bizi "sputnik Armanie” mediasında biabır etdilər".
Son
olaraq Elçin Şıxlı onu əlavə etdi ki, informasiya müharibəsi ilə yalnız peşəkarlar
mübarizə aparmalıdır. İnformasiyanın nə demək olduğunu, dəyərini anlayanlar və
onunla rəftar etməyi bacaranlar bu işə cəlb olunmalıdır.
"Turan" informasiya agentliyinin təsisçisi Mehman Əliyevin fikrinə, informasiya müharibəsi ilə jurnalist məşğul olmalı deyil.
"
Düşünürəm ki, jurnalistin işi tamam başqadır. İnformasiya müharibəsi aparması
ona aid məsələ deyil. Əgər erməni jurnalistləri bununla məşğul olursa özləri
bilər. İnformasiya siyasətini dövlət apara bilər".
Mehman
Əliyevin sözlərinə görə, Azərbaycanda dövlət siyasətində bu sistem yoxdur. "Bu mövzuda
ermənilər bizdən irəlidir. Çünki onların informasiya müharibəsi movzusunda
uzunmüddətli təcrübələri var. Bu siyasət onlara Sovetlər Birliyindən qalıb.Uzun
müddət bu sahədə işlər aparıblar və indi bəhrəsini göstərir".
"Yeni
Nəsil Jurnalistlər Birliyi”nin sədri Arif Əliyevin sözlərinə görə informasiya
müharibəsi əslində çətin və vacib bir prosesdir.
"İnformasiya
müharibəsinin aparılması xüsusi mütəxəssislər tərəfindən həyata keçirilməlidir.
İndiki iki dövlət arasında baş verən hal isə informasiya qarşıdurması adlandırsaq
daha doğru olar. Düşünmürəm ki, Azərbaycan bu mübarizədə Ermənistandan çox da
geri qalır”.
Arif
Əliyevin fikrincə, əsas məsələ bu sistemdə diplomatiyamızın uğursuz olmasıdır.
"İnformasiya
qarşıdurması havadan asılı bir şey deyil. Diplomatik cəhətdən uğursuzuluq varsa bu
problemi həll etmək çox vacibdır. Ermənistanla müqayisədə Azərbaycan 10-15 illdir ki, təfbirlər keçirir. Bizim ölkədə dövlət media ilə münasibətlərini daha
yaxşılaşdırmalı və bu sahədə peşəkarlar yetişdirməlidir”.
Milli
Məclisin Beynəlxalq münasibətlər komitəsinin üzvü, deputat Asim Mollazadəninsözlərinə görə, Ermənistanın dünyada zəngin təşkilatlanmış çoxlu diasporları var
və indiki durumda bu onların köməyinə çatır.
"Azərbaycana
qarşı informasiya müharibəsi daha da şiddətlənib. Çünki Ermənistan çox ciddi
müharibəyə hazırlaşır və bu istiqamətdə dünyanın bir çox ölkələrində yerləşmiş
zəngin təşkilatlanmış erməni diasporası müfaviq göstərişlər verərək Azərbaycana
qarşı yalan , böhtan kampaniyasını daha da gücləndirir. Nəzərə almalıyıq ki, bu
istiqamətdə Azərbaycanın imkanları daha
da zəifdir. Bizim geniş və güclü ,varlı diasporamız yoxdur. Bir sıra ölkələrdə
uzun illərdir Türkiyəyə qarşı müharibə aparan erməni diasporası bu gün əsas hədəf
kimi Azərbaycanı seçib. ABŞ, Fransa, Rusiya, Latın Amerikası ölkələrində bu istiqamətə
böyük vəsaitlər ayrılıb. Bu istiqamətdə dünya
mediası ilə birgə Azərbaycanın qeyri hökümət təşkilatları prosesdə iştirak etməlidir.
Başqa ölkələrdə yaşayan hər bir azərbaycanlı bu mövzuda təşkilatlanmalı və çox
ciddi müqavimət göstərməlidir. Hələlik güc nisbəti bizim xeyrimizə deyil , amma nəzərə
almaq lazımdır ki, səngərdə Azərbaycan əsgəri erməni əsgərindən daha güclüdür".
Politoloq
Ceyhun Osmanlı isə informasiya müharibəsində Ermənistanın Azərbaycana
uduzduğunu deyir.
"Azərbaycan
və Ermənistan siyasətçilərinin yanaşmalarını müqayisə etsək Azərbaycanın tam
mövqeyini görə bilərik. Nəticədə isə ölkənin parlamenti, prezident köməkçiləri, ölkə başçısının mövqeyini dəstəkləyən prizmadan çıxışlarının da şahidi olarıq.
Ermənistanda isə bunun əksidir. Paşinyanla parlament arasında fikir ayrılıqları
var. Sülh və hərb kimi nə istədikləri belə məlum deyil. Prezidentin
son həftə ərzində Rusiya mətbuatında dərc edildiyi məqalələr də Azərbaycanın açıq
mövqeyini dünya ictimaiyyətinə çatdırmış oldu", - deyə Osmanlı bildirib.
O, həmçinin son vaxtlar Azərbaycan həqiqətlərinin xarici mediada marağın artmasına diqqət çəkdi.
"Son aylar isə BBC aparıcısının Paşinyanı Hard Talk verilişində çətin vəziyyətə salması, Ərəb və türk mətbuatının ermənilərin PKK terrorçularını Qarabağa yerləşdirməsi faktını qabartması və bunun Avropa media resurslarında təsdiq edilməsi, ABŞ-da Heritage Fondu və Caspian Policy Center-in açıqlamaları, o cümlədən Rusiyada Rosbalt və Pravda-da Azərbaycan Prezidentinin açıqlamalarının dərc edilməsi onu göstərir ki, Azərbaycan artıq dünyada informasiya blokadasında deyil və dünyada bizim mövqeyimizi anlayanların sayı çoxalır.
Gülnar Nazimqızı
www.anews.az
Bizi sosial şəbəkələrdə izləyin !
