Azərbaycanın qeyri-neft-qaz ixracı 18%-dən çox artıb

Azərbaycanın qeyri-neft-qaz sektoru üzrə ixracının dəyəri bu ilin yanvar-iyul aylarında 2,5 milyard ABŞ dolları təşkil edib.

İqtisadi İslahatların Təhlili və Kommunikasiya Mərkəzinin məlumatına görə, bu göstərici ötən ilin eyni dövrü ilə müqayisədə 18,3% çoxdur. Hesablamaya qeyri-monetar qızılın ixracı daxil edilməyib.

Təkcə iyul ayında qeyri-neft-qaz ixracı illik müqayisədə 15,8% artaraq 384,8 milyon dollar olub.

Yanvar-iyul aylarında yeyinti məhsullarının ixracının dəyəri 123 milyon dollar təşkil edib. Qeyri-yeyinti məhsullarının ixracı isə 26% artaraq 261,8 milyon dollara çatıb.

Hesabat dövründə şəkər ixracının dəyəri 2,6 dəfə, pambıq ipliyinin 81,9%, bitki və heyvan mənşəli piy və yağların 39,5%, alüminium və ondan hazırlanan məmulatların 39,4%, pambıq lifinin 24,9%, qara metallar və onlardan hazırlanan məmulatların 23,3% artıb.

Bundan başqa, çayın ixracı 19,5%, meyvə-tərəvəzin 16,4%, spirtli və spirtsiz içkilərin ixracı isə 3% artıb.

Yanvar-iyulda aqrar məhsulların ixracının dəyəri 22,1% artaraq 673,4 milyon dollar, aqrar-sənaye məhsullarının ixracı isə 24,8% artaraq 223,1 milyon dollar olub.

Beləliklə, aqrar və aqrar-sənaye məhsullarının ümumi ixrac dəyəri illik müqayisədə 22,8% artaraq 896,4 milyon dollara çatıb.

Gülnar