Sabir Fondu və “Qanımızın səsi” kitabı təqdim olunub

Bakıda, “Galereya-1969” sərgi salonunda Mirzə Ələkbər Sabir Fondunun və qurumun prezidenti Sevda Tahirlinin “Qanımızın səsi” kitabının təqdimat mərasimi keçirilib. Tədbirdə deputatlar, QHT və KİV nümayəndələri, şair və yazıçılar iştirak edib.

"Media forum" saytı xəbər verir ki, fondun prezidenti Sevda Tahirli deyib ki, qurum 2012-ci ildə yaradılıb, Ədliyyə Nazirliyində dövlət qeydiyyatına alınıb. Fondun əsas məqsədi Sabir yaradıcılığının öyrənilməsi və irsinin tədqiqindən ibarətdir. O qeyd edib ki, Sabir Fondu 2013-cü ildə QHT-lərə Dövlət Dəstəyi Şurasının maliyyə dəstəyi ilə “Azərbaycan ədəbi dilinin tətbiqi qüsurlarının monitorinqi” layihəsini gerçəkləşdirib.

Mərasimdə Mirzə Ələkbər Sabirin gəlini Zemfira Tahirli, Milli Məclisin deputatı Musa Qasımlı, yazıçı-publisist, telejurnalist Orxan Fikrətoğlu, “Dədə Qorqud” Milli Fondunun prezidenti Eldar İsmayılov, professor Alxan Bayramoğlu, şair Səlim Babullaoğlu, “Millennium Turizm” MMC-nin direktoru Ruslan Quliyev və başqaları çıxış ediblər.

Sevda Tahirli müəllifi olduğu “Qanımızın səsi” adlı kitabı haqqında məlumat verib. O bildirib ki, 2013-cü ildə çap olunmuş kitabın mövzusu yaşından asılı olmayaraq hər kəsin marağına səbəb ola biləcək bir məsələyə - 4 fərqli qan qrupunun insanın həyatındakı roluna, onun xarakterinə, karyerasına, uğurlarına, sağlamlığına və eləcə də xəstəliklərinə, həyati seçimlərinə, qarşı cinsə münasibətinə, ailə bağlarına, hətta ana olma imkanlarına necə təsir etməsi kimi aktual bir məsələyə həsr olunub.

ANN.Az