Firəngiz Əlizadə: Gənc bəstəkarlar iş tapa bilmədikləri üçün yanıma gəlib ağlayırlar

Bəstəkarlar İttifaqının sədri Firəngiz Əlizadə gənc bəstəkarların iş və dolanışıq problemi yaşadığını, onların əsərlərinin isə yetərincə ifa olunmadığını açıqlayıb.

“Bu gün ən acınacaqlı vəziyyətdə bizim bəstəkarlar yaşayırlar. Artıq diplomda ‘bəstəkar’ sözü yazılmır”, -Əlizadə bildirib.

Onun sözlərinə görə, bəstəkarlıq fakültələri tədricən bağlanır və ya başqa fakültələrlə birləşdirilir. O, akademiyanın bəstəkarlıq fakültəsinin rəhbərindən son illərdə bu ixtisasa qəbul üçün müraciətlərin demək olar ki, olmadığını eşitdiyini söyləyib.

Əlizadə bəstəkarların əsərlərinin alınması və ifa olunması ilə bağlı da problemlər olduğunu qeyd edib. O bildirib ki, 2007-ci ildən Mədəniyyət Nazirliyinin alqı-satqı komissiyasının üzvüdür, lakin komissiyanın iclaslarından və hansı əsərlərin alındığından xəbərdar deyil.

“Gənc bəstəkarlar mənim yanıma gəlib ağlayırlar.

‘Firəngiz xanım, bizim dolanışığımız yoxdur. Bizə iş verilmir’”, – o deyib.

Əlizadənin sözlərinə görə, bəzi gənc bəstəkarlar restoranda musiqi ifa edərək qazandıqları pulla kirayə haqqını ödəyirlər.

Bəstəkar müsabiqədə mükafat qazanan və ya yubileyi keçirilən sənətçilərin əsərlərinin belə bəzən səsləndirilmədiyini deyib. “Müsabiqədə laureat olur, ifa olunmur. Yubiley olur, əsəri ifa olunmur”, – Əlizadə bildirib.