Mədəni irsin qorunması Azərbaycana əlavə gəlir gətirə bilər - təklif

Mədəni irsin qorunması və təbliği, eləcə də milli mədəniyyət məhsullarının satış platformalarına çıxarılması hesabına əlavə gəlir əldə etmək mümkündür. Bunu deputat Əlibala Məhərrəmzadə deyib.

Deputat bu təkliflə çıxış edərək mədəniyyətin Azərbaycanın ÜDM-də payının gələcəkdə 2 faizə çatdırılmasının mümkünlüyünü qeyd edib.

O bildirib ki, bu il Azərbaycanın ÜDM-nin 140 milyard manat olacağı proqnozlaşdırılır. Onun sözlərinə görə, ötənilki göstəricilər əsasında mədəniyyət sahəsinin ÜDM-də payı təxminən 1 faiz təşkil edir.

Məhərrəmzadə qeyd edib ki, mədəni irsin və mədəni abidələrin qorunmasına 49,7 milyon manat, kino sahəsinə isə təxminən 9 milyon manat vəsait ayrılır. O hesab edir ki, bu vəsaitlər mədəniyyətlə yanaşı, turizmin və qeyri-neft sektorunun inkişafına da töhfə verə bilər.

“Biz mədəniyyətimizi təşviq edərək onu hansısa satış platformasına çevirə bilərik və oradan da kifayət qədər gəlir əldə edə bilərik. Bunun üzərində analitik baxış bucağı formalaşsa, çox yaxşı olar”, – deputat bildirib.

O, bu istiqamətdə Mədəniyyət Nazirliyinin analitik yanaşma hazırlamasını təklif edib.

Deputatın sözlərinə görə, dünya praktikasında mədəniyyətin ÜDM-də payı təxminən 1-3 faiz arasında dəyişir. O, mədəniyyətin iqtisadi potensialından istifadənin Azərbaycanın hüdudlarından kənarda milli irsin təbliğinə də xidmət edə biləcəyini vurğulayıb.