ANS PRESS-in bölgə müxbirinin verdiyi məlumata görə, Nabranda noyabirin 17-si gecə saatlarında elektrik enerjisinin verlişi üstündə həmkəndlilər arasında dava düşüb.

Sərxoş vəziyyətdə olan Elman Cəllad oğlu Musayev həmyerlilərinə bıçaqla xəsarətlər yetirib. O əvvəlcə enerjisi kəsilən Albert Məmmədəliyevi daha sonra isə 27 yaşlı Famil İsayevi və 39 yaşlı Samur Səmodovu bıçaqlayıb.

Nəticədə Famil İsayev və Samur Səmədov müxtəlif dərəcəli ağır bıçaq xəsarətləri ilə Xaçmaz rayon mərkəzi xəstəxanasının cərahiyyə şöbəsinə çatdırılıblar.

Xəstəxananın həkim-cərrahı Rəcəb Qurbanovun verdiyi məlumata görə, onların qarın boşluğunda əməliyyat aparılıb və indi vəziyyətləri orta ağırdır. Albert Məmmədəliyev isə yüngül xəsarət aldığından ilkin tibbi yardımdan sonra evə buraxlıb.

Kütləvi davanı səhərə qədər araşdıran Xaçmaz PŞ-nin əməliyyatçıları üç həmkəndlisinə bıçaq xəsarəti yetirən Elman Musayevi tutaraq isti izlərlə istintaqa cəlb ediblər.

Xaçmaz PŞ-nin rəis müavini Valik Vəlimətov kütləvi davanın təfərruatlarının polis şöbəsində araşdırmaların davam etdirildiyini bildirdi.