Azərbaycan İrandakı səfirini yenidən geri çağıra bilər
17.09.2024 13:19
Azərbaycanın İrandakı səfirliyinə hücum edən terrorçu ilə bağlı çıxarılan edam qərarı tez bir zamanda icra olunmasa, Azərbaycan İrandakı səfirini növbəti dəfə geri çağıra bilər. Bu barədə Report-a diplomatik mənbələrdən məlumat daxil olub.
2023-cü il yanvarın 27-də "Kalaşnikov” silahı ilə silahlanan 55 yaşlı Yasin Hüseynzadə adlı şəxs Azərbaycan səfirliyinə hücum edib, mühafizə xidmətinin rəisi qətlə yetirilib, iki nəfər isə yaralanıb. Onun barəsində 2023-cü il oktyabrın 2-də ölüm hökmü çıxarılsa da üstündən bir il keçməsinə baxmayaraq hökm hələ də icra olunmayıb.
Aparılan araşdırmaların nəticələrinə görə, Yasin Hüseynzadə İran-İraq müharibəsi zamanı SEPAH sıralarına üzv olub və 31-ci Aşura diviziyasında da iştirak edib.
1999-cu ilə qədər Təbrizdə SEPAH qərargahında yük maşını sürücüsü işləyib və oradan təqaüdə yollanıb. O, 1999-2006-cı illərdə Mərənddəki Yaldur məscidi ilə bağlı "Bəsic” qüvvələrinin komandanı olub və "Bəsic” bazası ilə əlaqəsini davam etdirir.
Hətta onun Təbrizdə "Bəsic” və SEPAH qüvvələri ilə birlikdə son aylar Bükan və Marağada baş verən anti-hökumət etirazlarının dağıdılmasında iştirak etdiyi barədə məlumatlar var.
Bir günahsız insanın qətli, iki nəfərin yaralanmasını həyata keçirən bu terrorçunun edamının gecikməsini onun SEPAH üzvü olması ilə əlaqələndirənlər də var.
Rəsmi Bakı bu ilin yanvarında səfirliyin öz fəaliyyətini iki şərt daxilində bərpa edəcəyini bildirib. Bura cinayətkarın layiqli cəzasını alması və İranın səfirlik əməkdaşlarının təhlükəsizliyinə tam zəmanət verməsi olub.
N.Təbrizli
www.anews.az
Oxşar xəbərlər
Oxşar xəbərlər
Son xəbərlər 
Daha çox
Foto 
Video 
