Əliyev İranın müdafiə nazirini qəbul edib

Fevralın 6-da Azərbaycan Prezidenti İlham Əliyev İran İslam Respublikasının müdafiə və silahlı qüvvələrə dəstək naziri Əziz Nəsirzadə və rəhbərlik etdiyi nümayəndə heyətini qəbul edib.

Qəbul zamanı dövlət başçısı bir neçə gün əvvəl İran Prezidenti Məsud Pezeşkian ilə telefon danışığını xatırladaraq, yüksək səviyyəli təmasların ikitərəfli gündəlik məsələlərin müzakirəsi üçün əlverişli imkan yaratdığını bildirib. O, Pezeşkianın ötən il Azərbaycana rəsmi səfərinin uğurlu keçdiyini və əlaqələrin inkişafına töhfə verdiyini vurğulayıb.

Prezident Əliyev qeyd edib ki, Azərbaycanın təşəbbüsü ilə Cənubi Qafqazda sülh bərqərar olub, bu həm Azərbaycan, həm də Ermənistanla həmsərhəd olan İran üçün strateji əhəmiyyət daşıyır. Dövlət başçısı həmçinin bölgədə yaranmış gərginliyin aradan qaldırılması və sülhün təmin olunması üçün ölkəsinin dəstək göstərməyə hazır olduğunu bildirib.

Əziz Nəsirzadə Prezident Əliyevə İran Prezidenti Məsud Pezeşkianın salamlarını çatdırıb və ölkəsinin Azərbaycana, o cümlədən Xankəndiyə səfərlərini məmnunluqla xatırladığını vurğulayıb.

Söhbət zamanı iki ölkə arasında dostluq, qardaşlıq və mehriban qonşuluq prinsiplərinə əsaslanan ikitərəfli münasibətlərin inkişafı və müdafiə sahəsində əməkdaşlıq perspektivləri müzakirə olunub.