Ermənistanda üsul-idarə dəyişikliyinin – Səbəbi

 

Bu sözləri Axar.az-a hazırda Ermənistanda ciddi şəkildə müzakirə olunan Konstitusiya islahatının həyata keçirilməsi ilə bağlı Serj Sərkisyanın təklifinə münasibət bildirərkən politoloq Ərəstun Oruclu deyib. O, Sərkisyanın bu istəyinin arxasında bəlli səbəblərin dayandığını bildirib:

 

"Konkret olaraq əsas məqsəd hazırkı hakimiyyəti əldə saxlamaq istəyi ilə bağlıdır. Çünki Sərkisyan artıq iki dəfə prezident seçilib və növbəti dəfə seçilməsi konstitusiyaya ziddir. Hazırda müəyyən islahatlar həyata keçirməklə Ermənistanda dəyişiklik etməyə çalışırlar. Görünür, ölkə rəhbərliyi hakimiyyəti qoruyub saxlamağın yeganə çıxış yolunu parlamentli respublikaya keçməkdə görüb. Çünki yalnız o təqdirdə Sərksiyan prezident olmasa belə, baş nazir postuna yiyələnəcək ki, nəticə etibarilə də bu yolla azı iki il hakimiyyətdə qala biləcək. Ermənistan tipli avtoritar, kriminal dövlətlərdə hakimiyyət və üsul-idarə dəyişikliyi heç vaxt dövlət maraqlarına hesablanmır. Hesab edirəm ki, bu hansısa şəxslərin və qrupların marağına uyğun olaraq atılmış bir addımdır”.

 

Qeyd edək ki, Ermənistan Prezidenti Serj Sərkisyan Konstitusiya dəyişikliyi ilə bağlı Milli Şuraya layihə göndərib. Layihənin parlamentin sentyabrda başlayacaq ilk payız iclasında müzakirəsi gözlənilir.