Azərpambıq MMC-nin ixrac gəlirləri 11 ayda 30,6% azalıb

Azərbaycanın pambıq sektorunda fəaliyyət göstərən Azərpambıq Aqrar Sənaye Kompleksi bu ilin yanvar–noyabr aylarında 36 milyon ABŞ dolları dəyərində məhsul ixrac edib.

İqtisadi İslahatların Təhlili və Kommunikasiya Mərkəzinin “İxrac icmalı”nın dekabr sayına istinadən Report agentliyi xəbər verir ki, bu göstərici ötən ilin eyni dövrü ilə müqayisədə 15,9 milyon dollar və ya 30,6% azdır.

Hesabatda qeyd olunur ki, 11 ay ərzində Azərbaycanın qeyri-neft sektoru üzrə ümumi ixracı isə illik müqayisədə 7,3% artaraq 3,3 milyard ABŞ dollarına çatıb.

Azərpambıq 2018-ci ildə yaradılıb və pambıq istehsalı, tədarükü, emalı, həmçinin pambıq mahlıcı, texniki çiyid, pambıq yağı və digər emal məhsullarının satışı ilə məşğuldur.

Şirkətin tərkibində Şirvan, Saatlı, Ağcabədi, Beyləqan, Bərdə və Biləsuvarda yerləşən altı pambıq emalı zavodu, eləcə də ölkənin müxtəlif rayonlarında yeddi istehsal və tədarük məntəqəsi fəaliyyət göstərir. Biləsuvar rayonunda Təcrübə-Sınaq Təsərrüfatı, Şirvan Pambıq Emalı Zavodunda isə texniki çiyiddən yağ istehsal edən sex mövcuddur.

Aytac