SOCAR: TANAP-ın tikintisi üzrə ilk mərhələ başa çatıb

 

"APA-Economics" xəbər verir ki, bu barədə SOCAR-ın prezidenti Rövnəq Abdullayevin "Azərbaycan" qəzetində dərc olunmuş məqaləsində deyilir.

 

Onun sözlərinə görə, sonradan bu həcmin 31 mlrd. kubmetrədək artırılması imkanları da nəzərə alınıb: "TANAP hazırda SOCAR-ın xaricdə həyata keçirdiyi ən böyük investisiya layihəsidir. Ötən il Qarsda Azərbaycan, Gürcüstan və Türkiyənin dövlət başçılarının iştirakı ilə təməli qoyulmuş bu kəmər boruların diametri və xəttin uzunluğu baxımından indiyədək dünya miqyasında gerçəkləşdirilən ən böyük təbii qaz boru xətti layihələrindən biri olacaq. Cari ilin avqust ayına qədər layihə üzrə iş həcmi 31,4% yerinə yetirilmişdir. Deyə bilərik ki, TANAP-ın tikintisi üzrə ilk mərhələ sona çatdırılıb və hazırda ikinci mərhələ üzrə işlər müvəffəqiyyətlə davam etdirilir".

 

SOCAR-ın prezidenti əlavə edib ki, "Cənub qaz dəhlizi"nin sonuncu seqmentini təşkil edəcək TAP kəmərinin təməli bu ilin mayında qoyulub: "Türkiyə-Yunanıstan sərhədindən başlayaraq Albaniya ərazisindən keçməklə Adriatik dənizi ilə İtaliyanın cənubuna, oradan da Qərbi Avropaya qədər uzanacaq bu kəmərin ilkin ötürücülük gücü ildə 10 milyard kubmetr həcmində nəzərdə tutulub. Xəzərin Azərbaycan sektorunun qaz-kondensat ehtiyatları ilə zəngin olduğu nəzərə alınaraq, "Cənub qaz dəhlizi” sistemi elə layihələndirilmişdir ki, gələcəkdə mümkün əlavə qaz həcmlərinin təchiz edilməsi üçün onun seqmentlərinin hər birinin, o cümlədən, TAP-ın ötürücülük gücü artırıla bilsin".