İcra başçısı: Prezidentin sərəncamı böyük ruh yüksəkliyinə səbəb olub

Bunu Trend-ə Cəbrayıl rayon İcra Hakimiyyətinin başçısı Kamal Həsənov deyib.

K.Həsənovun sözlərinə görə, hər kəs hesab edir ki, bu sərəncam Cəbrayılın tamamilə işğaldan azad edilməsinin başlanğıcıdır:

"Çox böyük ruh yüksəkliyi var. Biz çox qısa zamanda bir sorğu keçirdik və aydın oldu ki, Cocuq Mərcanlıdan olan 190-dan çox ailə qayıdıb kənddə yaşamağa hazırdır”.

İcra başçısı vurğulayıb ki, bu sərəncam aprel döyüşlərində ordumuzun əldə etdiyi qələbənin davamıdır:

"Aprel döyüşlərinə qədər həmin kənd təhlükəli bir zona idi, lakin aprel döyüşlərindən sonra kənd tamamilə Azərbaycanın nəzarəti altına keçdi və soydaşlarımızın doğma torpaqlarına qayıtması üçün şərait yarandı. Bütün bunlara görə Prezident İlham Əliyevə minnətdarlığımızı bildiririk və inanırıq ki, tezliklə Cəbrayıl rayonu tamamilə işğaldan azad ediləcək”.

Qeyd edək ki, ötən gün Azərbaycan Prezidenti işğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında sərəncam imzalayıb.

Sərəncama əsasən, Cəbrayıl rayonunun Cocuq Mərcanlı kəndinin bərpası ilə bağlı görüləcək işlər çərçivəsində birinci mərhələdə 50 fərdi yaşayış evinin, məktəb binasının və müvafiq infrastrukturun tikintisi üçün Azərbaycanın 2017-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan Qaçqınların və Məcburi Köçkünlərin İşləri üzrə Dövlət Komitəsinə ilkin olaraq 4 milyon manat ayrılıb.