Bu ölkə Ukraynaya 2,3 milyardlıq hərbi yardım göstərəcək
20.09.2022 11:35
Böyük Britaniya 2023-cü ildə Ukraynaya 2,3 milyard funt-sterlinq (2,63 milyard dollar) məbləğində hərbi yardım ayırmaq niyyətindədir. Bununla bağlı məlumatı "Financial Times" yayıb.
2022-ci ildə Böyük Britaniya Ukraynaya ümumilikdə 3,8 milyard funt-sterlinq (4,6 milyard dollar) məbləğində yardım edib.
Sentyabrın əvvəlində Liz Tras Ukrayna Prezidenti Volodimir Zelenski ilə telefon danışığında Londonun Kiyevə dəstəyinin uzun müddətli olacağını vurğulayıb. Krallığın keçmiş Baş naziri Boris Conson isə ölkəsinin Ukraynaya əlavə olaraq 1 milyard funt-sterlinq (1,2 milyard dollar) ayıracağını deyib.
Rusiya cari ilin fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.
Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.
Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.
Azərbaycan daxil olmaqla, BMT üzvlərinin mütləq əksəriyyəti Krım yarımadası və Donbası Ukraynanın ərazisi olaraq tanıyır.
Ləman Qasımova
www.anews.az
Foto 
Video 
