BMT-nin baş katibi Yer kürəsinin sakinlərinə Yeni il müraciəti edib

2023-cü ildə hər yerdə sülh əldə edilməlidir: Ukraynadan DXR-ə qədər. Bunu BMT-nin baş katibi Antonio Quterreş Yeni il müraciətində deyib.

Yeni ilin gəlişinin hər dəfə dirçəliş anı olduğunu qeyd edən BMT rəhbəri "köhnə ilin külünü süpürmək” və "yeni parlaq günə” hazırlaşmağın vaxtının yetişdiyini vurğulayıb.

BMT rəhbəri bildirib ki, gedən 2022-ci il çox çətin il olub. "Ukraynada, Əfqanıstanda, Konqo Demokratik Respublikasında və başqa yerlərdə insanlar daha yaxşı bir şey axtarmaq üçün evlərinin xarabalıqlarını tərk edərək köhnə həyatlarını tamamilə dəyişdilər".  Onun sözlərinə görə, dünyada müharibələrdən, meşə yanğınlarından, quraqlıqdan, yoxsulluqdan və aclıqdan qaçaraq yüz milyona yaxın insan evlərini tərk edib.

"2023-cü ildə biz indi həmişəkindən daha çox ehtiyac duyduğumuz sülhə nail olmalıyıq", - BMT rəhbəri vurğulayıb.

O əlavə edib ki, bu gün biz dialoq yolu ilə bir-birimizlə sülh bağlamalıyıq ki, bu da münaqişələrə son qoyacaq. BMT-nin Baş katibi daha davamlı gələcək üçün təbiətlə sülhün tərəfdarı olduğunu da bildirib. O, qadınların və qızların ləyaqət və təhlükəsizlik içində yaşaya biləcəyi evlərdə sülhün zəruriliyini xatırladıb.

António Guterres bütün insan hüquqlarına tam hörmətlə yanaşaraq "küçələrdə və qonşularımızla sülhə" çağırıb. O, dindarların hörmət etdiyi yerlərdə sülhə və digər insanların inanclarına qarşılıqlı hörmətə, həmçinin internetdə nifrət və təhqirlərdən uzaq sülhə çağırıb.

Antonio Quterreş əmindir ki, 2023-cü ildə bəşəriyyət sülhə nail olmağı öz söz və hərəkətlərinin əsas mənasına çevirməlidir.


www.anews.az