Azərbaycan sabit internetə görə 1 pillə geriləyib
19.04.2023 13:33
Azərbaycan sabit internetə görə 1 pillə geriləyib, mobil internetə görə isə 3 pillə irəliləyib. Bu barədə "Speedtest Global Index”in martda açıqladığı hesabatda bildirilir. Statistikaya görə, Azərbaycan sabit internet sürətinə görə 180 ölkə içində 118-ci, mobil
internet sürətinə görə isə 140 ölkə içində 54-cüdür.
"Speedtest Global Index”in fevral hesabatına görə, Azərbaycan sabit genişzolaqlı internetin orta sürətinə görə dünyada 118-ci yerdə qərarlaşıb. Bu isə əvvəlki ayla müqayisədə 1 pillə geriləməkdir.
Azərbaycan İnternet Forumunun prezidenti Osman Gündüz deyib ki, sabit internetin geriləməsinin səbəbi bölgələrdə fiberoptik infrastrukturun tam qurulmamsı ilə bağlıdır.
"Burada əsas problem
yaradan amil regionlarda çox sayda ərazilərin hələ də köhnə texnologiyalardan
istifadə etməsidir. Mobil internetin irəliləməsinin səbəbi isə təbii ki, onun hər yerdə daha çox əlçatan olmasıdır", - Osman Gündüz söyləyib.
Bununla yanaşı ekspert bildirib ki, artıq iki ilə yaxındır fiberoptik infrastrukturun qurulması ilə bağlı xeyli işlər görülüb.
"700 mindən artıq insana fiberoptik internet
bağlantısı təşkil olunub. Rəqəmsal İnkişaf və Nəqliyyat Nazirliyinin açıqlamasına görə gələn ilin sonunda
ölkədə fiberoptik sabit şəbəkə üzrə internet infrastrukturu tam qurulub, başa
catdırılacaqdır", - Osman Gündüz vurğulayıb.
Onun sözlərinə görə, hazırda 10-15 rayonda GPON (Gigabit Passive Optical Networks, - red) infrastrukturunun qurulması işləri davam
edir.
Ekspert fiberoptik xətlərin çəkilməsindən
sonra, mobil internetin qiymətinin yaxın illərdə aşağı düşəcəyini gözlədiyini də bildirib.
Eltac Nurullazadə
www.anews.az
Foto 
Video 
