Məşhur rəqs qrupu ilk dəfə Azərbaycana gəlir

SA Organization" artıq 15 ildir ki öz fəaliyyəti ilə adı haqqında kifayət qədər təsəvvür yarada bilib. Selahattin Atalay tərəfindən yaradılan şirkət bu illər ərzində istər ölkə daxilində, istərsə də ölkədən kənarda bir sıra iri konsert layihələrini reallaşdırmağa müvəffəq olub.

Şirkət Rusiya, Qazaxıstan, Ukrayna və bir çox ölkələrdə tanınmış ulduzların unudulmaz konsert proqramlarını təşkil edib. Ölkəmizdə bu işin təməlini qoyan şirkət kimi, "SA Organization" işinə mükəmməl və peşəkarcasına yanaşaraq indiyədək tanınmış ifaçılardan İbrahim Tatlıses, Nilufer, Ajda Pekkan, Alişan, Ingrid Alberini, Imagination, məşhur rəqs qruplarından olan "Anadolu ateşi", "Tararam", "Şaman", həmçinin Ruslana, Kenan Doğulu və s. məşhurların konsert layihələrinə imza atıb. Bu gün isə SA Organization" yeni konsert layihəsi ilə görüşünüzə gəlib.

Dünyaca məhşur step rəqsinin usta ifaçıları "Celtic Legends" rəqs qrupu ilk dəfə olaraq Azərbaycanın qonağı olacaq. Əfsanəvi rəqsləri ilə hər zaman dünyanın diqqət mərkəzində olan qrup sözün əsl mənasında Azərbaycan tamaşaçılarına tam fərqli bir gecə yaşadacaq.

1 və 2 mart tarixlərində Heydər Əliyev Sarayında baş tutacaq konsert proqramında tamaşaçılar professional rəqqasların sərgiləyəcəyi step rəqsinin ahəngindən zövq alacaqlar.

"Celtic Legends" qrupu 2001-ci ildə İrlandiyanın Konnemara torpaqlarında irland musiqisinə və rəqsinə böyük töhfələr vermiş Qalveydən olan gənc istedadlar tərəfindən yaradılıb. Rəqqaslar tamaşaçılarının nəzərində daima fərqli performansları ilə yadda qalıblar. Qrupun bütün rəqqasları erkən yaşlarından dünyaca məhşur rəqs yarışmalarının qalibi olublar. Qrup hər zaman öz tamaşaçısını milli irland rəqsinin sehrli ilə ovsunlayıb. Qrupun xoreoqrafı Jakinta Şarpe, musiqi direktoru Sin Makkarti və dünyaca məhşur qəhrəmanı Uilyam Boltdur.

Trend