Deputat təklif edir ki, mülkiyyətin qiymətləndirilməsi məhkəmə qərarı ilə olsun

Mülkiyyətin minimum məbləğdə qiymətləndirilməsi məhkəmə qərarı ilə müəyyən olunmalıdır. Bunu Milli Məclisin deputatı Fazil Mustafa deyib. 

"Bakıda köhnə binalar sökülərək yeniləri ilə əvəzlənir. Bəzən olur ki, sahibkar ərazidə işə başlamaq istəyir və bu zaman 70 ailə ilə razılaşır, digər 2 ailə razılaşmır. Bu onun mülkiyyət hüququdur. Amma bu cür problemlər zaman alır və problem də həll olunmur. Nəticədə sahibkar ortada qalır. Eyni zamanda bu cür proseslər zaman keçdikcə evlərin qiymətinə təsir edir və nəticədə ortaq razılıq olmur. Təklif edirəm ki, minimum vəsaitin məbləği məhkəmə qərarı ilə müəyyən olunsun. Əks halda sahibkar bu işdən uzaqlaşacaq və problemlər həllini tapmayacaq", - deputat bildirib. 

 Hazırda Bakı şəhəri üzrə 194 qəzalı və kəskin qəzalı bina olmaqla, ümumilikdə 6 415 mənzilə dair tədbirlərin icrasına başlanılıb.

Bundan əvvəl Bakı İcra Hakimiyyəti açıqlama yayaraq bildirib ki, Bakının yeni Baş Planı, Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramının icrası çərçivəsində ilk növbədə Yasamal rayonunda “Sovetski”nin növbəti hissəsi, Azərbaycan Dövlət Akademik Milli Dram Teatrının ətrafı (sağ istiqamətdə), Nizami küçəsi ilə Təzəpir məscidi arasındakı ərazilərdəki köhnə tikililər, istismar müddəti başa çatan kommunikasiya və mühəndis qovşaqları, qəzalı vəziyyətdə olan su və kanalizasiya xətləri söküləcək.

Eyni zamanda Bakının Sabunçu, Nəsimi, Xətai, Nərimanov və digər rayonlarında istismar müddəti başa çatmış, qəzalı vəziyyətdəki binalar, evlər, qeyri-yaşayış obyektləri söküləcək.

Gülnar Nazimqızı