Hikmət Hacıyev: Aİ-Azərbaycan tərəfdaşlığı strateji əhəmiyyət daşıyır

Avropa İttifaqı-Azərbaycan tərəfdaşlığı strateji əhəmiyyət daşıyır və tərəflər arasında siyasi dialoq və praktiki əməkdaşlıq son dövrdə intensivləşib.

Bunu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Aİ Şurasının Şərqi Avropa və Mərkəzi Asiya üzrə İşçi Qrupunun (COEST) nümayəndə heyəti ilə görüşü barədə “X” hesabında paylaşımında bildirib.

Hacıyev oktyabrın 1-də Aİ Şurasının COEST nümayəndə heyətini qəbul etdiyini qeyd edib. Onun sözlərinə görə, nümayəndə heyətində Avropanın 20-dən çox ölkəsinin təmsilçiləri iştirak edib.

“Aİ-Azərbaycan tərəfdaşlığı strateji əhəmiyyət daşıyır və qarşılıqlı hörmət, bərabərlik və ümumi fayda prinsipləri əsasında inkişaf edir. Son dövrdə yüksək səviyyəli təmaslar vasitəsilə siyasi dialoq intensivləşib, praktiki əməkdaşlıq isə əhəmiyyətli dinamika qazanıb”, - Hacıyev bildirib.

O, Azərbaycanın Avropanın enerji təhlükəsizliyinə verdiyi töhfəni və regional bağlantılılıqda, xüsusilə Orta Dəhliz çərçivəsində rolunu Aİ-Azərbaycan münasibətlərinin əsas istiqamətləri sırasında qeyd edib.

Hacıyev əməkdaşlığın təmiz enerji, rəqəmsal transformasiya, innovasiyalar və investisiyalar sahələrini də əhatə etdiyini bildirib.

Onun sözlərinə görə, bu il təhlükəsizlik sahəsində dialoq Siyasi və Təhlükəsizlik Dialoqu səviyyəsinə genişləndirilib. Tərəflər həmçinin yeni hərtərəfli ikitərəfli saziş və yenilənmiş Tərəfdaşlıq Prioritetləri üzərində işləyirlər.

“İnkişaf edən ikitərəfli gündəm ümumi maraqları praktiki nəticələrə çevirmək üçün imkan yaradır”, - Hacıyev qeyd edib.