Süni intellektlə tələbələrin görüntülərini montaj edərək şantaj edən şəxs saxlanılıb

Daxili İşlər Nazirliyinin (DİN) Kibercinayətkarlıqla Mübarizə Baş İdarəsi müxtəlif ali təhsil müəssisələrində oxuyan tələbələrin foto və video görüntülərini montaj edərək sosial şəbəkələrdə yayan, materialların silinməsi müqabilində onlardan pul tələb edən şəxsi saxlayıb.Bu barədə DİN məlumat yayıb.

Bildirilib ki, əməliyyat-texniki tədbirlər nəticəsində 25 yaşlı İlkin Nəhmədov saxlanılıb.

Araşdırmalar zamanı müəyyən edilib ki, o, “TikTok” və “Instagram” sosial şəbəkələrindən tələbələrə məxsus foto və video görüntüləri əldə edərək süni intellekt proqramları vasitəsilə montaj edib. Daha sonra görüntülərə təhqiramiz və rüsvayedici ifadələr əlavə edərək saxta sosial şəbəkə hesablarında yayıb və həmin materialların silinməsi üçün tələbələrdən pul istəyib.

Faktla bağlı Kibercinayətkarlıqla Mübarizə Baş İdarəsində cinayət işi başlanılıb, araşdırma davam etdirilir.