Azərbaycan tarixi-mədəniyyət abidələrinin vahid sistemlə pasportlaşdırır

Tarixi və mədəniyyət abidələrinin vahid qaydalar əsasında pasportlaşdırılması ölkənin mədəni irsinin qorunması baxımından mühüm əhəmiyyət kəsb edir.  Bu barədə deputat Polad Bülbüloğlu Milli Məclisin  plenar iclasında uyğun qanun layihəsinin ikinci oxunuşda təqdimatı zamanı bildirib. 

Deputat qeyd edib ki, təqdim olunan qanun layihəsi — abidələrin pasportlarının nümunəvi formasının müəyyən edilməsi, enerji daşıyıcılarına ehtiyac duyan abidələrin sistemləşdirilməsi və vahid elektron informasiya bazasının yaradılması istiqamətində hüquqi əsasların möhkəmləndirilməsinə xidmət edir.

“Azərbaycan zəngin tarixi və mədəni irsə malik ölkədir. Bu irsin qorunması yalnız fiziki mühafizə ilə deyil, sistemli uçot və sənədləşmə ilə də təmin olunmalıdır,” —  Polad Bülbüloğlu vurğulayıb.

Deputat layihənin əhəmiyyətini yüksək qiymətləndirərək bildirib ki, bu sahədə müasir texnologiyaların tətbiqi, vahid elektron baza və mərkəzləşdirilmiş nəzarət sistemi həm mədəni irsin qorunması, həm də gələcək nəsillərə ötürülməsi baxımından vacibdir.

O, həmkarlarını layihənin ikinci oxunuşda qəbuluna səs verməyə çağırıb və sənədin qəbulunu mədəniyyət siyasətində irəliyə doğru mühüm addım kimi qiymətləndirib.

Layihə daha sonra səsverməyə çıxarılaraq Milli Məclis tərəfindən ikinci oxunuşda qəbul edilib.

N.Təbrizli