Media və Yayım Şurası sosial şəbəkələrdə koordinasiyalı fəaliyyət barədə xəbərdarlıq edib

Azərbaycanda təhsilalanlar və təhsilverənlər üçün vahid geyim qaydalarının təsdiqlənməsi dünyəvi təhsil prinsipinin və təhsil mühitində vahid yanaşmanın təmin olunmasına xidmət edir.Bu barədə Media və Yayım Şurasının açıqlamasında bildirilib.

Açıqlamada qeyd olunub ki, bəzi dairələr məsələni qərəzli şəkildə siyasiləşdirməyə, dini müstəviyə çəkməyə və süni ictimai gərginlik yaratmağa çalışır.

Şuranın məlumatına görə, xüsusilə sosial media platformalarında koordinasiyalı fəaliyyət müşahidə olunur. Eyni və ya oxşar məzmunlu paylaşımların, neqativ şərh və reaksiyaların qısa müddətdə kütləvi şəkildə yayılması, eləcə də ictimai qaydanı pozmağa çağırışlar diqqət çəkir.

Açıqlamada bu halların trol hücumları və ölkə xaricindən vahid mərkəzdən idarə olunan informasiya manipulyasiyası ilə əlaqəli olduğuna dair ciddi əsasların olduğu bildirilib. Şuranın fikrincə, məqsəd ictimai rəyi təhrif etmək, süni narazılıq görüntüsü yaratmaq və mövzunu siyasi məqsədlər üçün istifadə etməkdir.

Media və Yayım Şurası vətəndaşları, media subyektlərini və sosial şəbəkə istifadəçilərini şübhəli hesabların koordinasiyalı fəaliyyətinə qarşı diqqətli olmağa, manipulyativ məzmunu yoxlamadan paylaşmamağa və süni informasiya dalğalarının təsirinə düşməməyə çağırıb.