Azər Badamov: Satınalma prosedurları layihələrin icrasını ləngidir

Azərbaycanda dövlət satınalmaları prosedurlarının mürəkkəbliyi layihələrin icrasına ayrılan müddəti azaldır və bəzi hallarda işlərin yarımçıq qalmasına səbəb olur. Bunu deputat Azər Badamov Milli Məclisin müvafiq komitəsinin iclasında bildirib.

Onun sözlərinə görə, satınalma prosesində kotirovkaların təqdim edilməsi üçün 10 gün, nəzarətedici orqanın baxışı üçün 10 gün, zəruri hallarda Nazirliyin ekspertizası üçün 20 gün, ekspertiza zamanı çatışmazlıqlar aşkarlandıqda isə əlavə 20 gün nəzərdə tutulur. Qərarın qəbul edilməsi üçün tələb olunan beş gün də nəzərə alındıqda proses xeyli uzanır.

Deputat qeyd edib ki, bu prosedurlar nəticəsində satınalma prosesi 8-9 aya qədər davam edə bilir. Bu isə tenderin elan olunması və işlərin həyata keçirilməsi üçün qalan müddətin azalmasına gətirib çıxarır.

Badamovun sözlərinə görə, xüsusilə regionlarda payız aylarında havaların sərin və yağıntılı keçməsi layihələrin vaxtında icrasını çətinləşdirir. Nəticədə ilin sonunda istifadə olunmayan büdcə limitləri geri qaytarılır və bəzi layihələr yarımçıq qala bilir.

Deputat satınalma prosesinin müddətinin azaldılması, layihələrin icrası üçün ayrılan vaxtın isə artırılması məqsədilə qanunvericiliyə müvafiq dəyişikliklərin edilməsini təklif edib.