Məktəblərdə geyim qaydalarına etiraz edən 37 nəfər həbs edilib

Azərbaycanda dövlət ümumi təhsil müəssisələrində vahid geyim qaydalarının tətbiqi ilə bağlı ictimai qaydanı kobud şəkildə pozmaqda şübhəli bilinən 37 nəfər həbs edilib. Bu barədə Daxili İşlər Nazirliyinin (DİN) Mətbuat Xidmətindən bildirilib.

Nazirliyin məlumatına görə, Bakıda bir qrup şəxs vahid geyim qaydalarının tətbiqi ilə bağlı məktəblərdə təhsil işçiləri ilə münaqişəli vəziyyət yaradıb, dövlət təhsil müəssisələrinə zərər vurub, həmçinin ictimai qaydanı pozan, nəqliyyatın hərəkətinə və məktəblərin normal fəaliyyətinə mane olan hərəkətlərə cəhd edib.

Faktla bağlı DİN-in müvafiq istintaq qurumlarında Cinayət Məcəlləsinin 233-cü maddəsi ilə cinayət işi başlanılıb. Həmin maddə ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etməyə görə məsuliyyət nəzərdə tutur.

DİN bildirib ki, görülən tədbirlərin məqsədi qanunvericiliyin tələblərinin icrasını təmin etmək, ictimai asayişin və nəqliyyatın hərəkətinin pozulmasının qarşısını almaq, təhsil müəssisələrinin normal fəaliyyətini və vətəndaşların təhlükəsizliyini qorumaqdır.

Nazirlik ictimai qaydanın qorunması istiqamətində tədbirlərin davam etdiriləcəyini, qanunazidd hərəkətlərə yol verən şəxslərin məsuliyyətə cəlb olunacağını qeyd edib.

 Nazirlər Kabinetinin qərarı ilə dövlət ümumi təhsil müəssisələrində şagirdlərin vahid geyim forması ilə bağlı qaydalar müəyyən edilib. Bakı Şəhəri üzrə Təhsil İdarəsi oktyabrın 9-da bu tələblərin icrasına nəzarət məqsədilə məktəblərdə monitorinqlərə başlanacağını açıqlayıb.