Dövlət ümumi təhsil müəssisələrində geyim qaydalarının icrasına dair monitorinqlərə başlanılıb

Dövlət ümumi təhsil müəssisələrində şagird və müəllimlər üçün müəyyən edilmiş geyim tələblərinin icra vəziyyətinin yoxlanılmasına başlanılıb.Bu barədə Bakı Şəhəri üzrə Təhsil İdarəsindən məlumat verilib.

Bildirilib ki, monitorinqlər zamanı şagirdlərin məktəbli forması, müəllimlərin isə pedaqoji fəaliyyətin xarakterinə və işgüzar mühitə uyğun geyim qaydalarına əməl etməsi araşdırılır.

Eyni zamanda, məktəblərdə qaydaların icrasına nəzarətin təşkili və bu barədə maarifləndirmə işlərinin aparılması da diqqətdə saxlanılır.

İdarənin məlumatına görə, geyim tələblərinə uyğun olmayan hallar aşkarlandıqda məktəb rəhbərliyi şagirdlər və müəllimlərlə profilaktik və maarifləndirici söhbətlər aparıb, zəruri hallarda valideynləri məktəbə dəvət edib.

Bununla yanaşı, müəyyən edilmiş geyim tələblərinə uyğun gəlməyən şagird və müəllimlərin dərslərə buraxılmadığı hallar da qeydə alınıb.

Açıqlamada bəzi məktəblərdə tədris mühitinə uyğun olmayan davranışların müşahidə edildiyi, bunun dərs prosesinə maneələr yaratdığı və məktəb əmlakına ziyan vurulması ilə nəticələndiyi bildirilib. Həmçinin geyim qaydalarının icrası ilə əlaqədar müəllimlərə və məktəb rəhbərliyinə qarşı təzyiq və təhdid hallarının olduğu qeyd edilib.

İdarədən bildirilib ki, geyim qaydalarının icrasına nəzarətin gücləndirilməsi məqsədilə monitorinqlər davam etdiriləcək.